SPOON

营业中

休息中

炮台山有间西餐厅，全日免收加一，主打多款西式料理，意粉饭、肉类、仲有前菜、小食同甜品。估唔到晚上到访都几多人帮衬，店内环境唔大但座位之间有适当距离，适合聚餐。私心推介蜜糖芥末烧黄油鸡，半只份量，外层呈现金黄色，皮够薄身，肉质够嫩且多汁，咬落啖啖肉好满足。旁边附上鲜甜烧菠萝同少量杂菜沙律可减低油腻感。唔够饱嘅可以转意粉。烟肉芝士牛肉汉堡同样出色，包比想像中大个，面包松软，牛肉厚身且软嫩，配上咸香烟肉、芝士、生菜同番茄，层次分明。旁边有少量薯条，炸至酥脆可口，已调味过，邪恶又好味。明太子扁意粉软硬度适中，酱汁够多足以捞面，不过记得要快啲食唔系嘅话会变硬。而红酒牛颊肉意式烩饭比起出面嘅煮得更加软身，好似食紧BB糊仔咁，感觉唔系好正宗但系神奇地好食。估唔到呢度都有几多甜品，要咗两个蛋糕试试，开心果千层蛋糕带微微香气，唔系好觉得有千层嘅效果，但系胜在唔甜感觉冇咁肥仔。相比之下会钟意巴斯克芝士蛋糕，质感幼滑性价比高。