汀汀烤活魚 (已結業)

今日同朋友一行三人去到荃湾三坡坊既汀汀烤活鱼，因朋友想当年小学既时候系附近读，所以相当熟路。汀汀烤活鱼呢个名有一排好似间唔中会听讲过，但印象唔系太深刻。鱼缸海鲜唔多，唔系太够派头。虽然如其名应该系主打食鱼，但系同行友人怕多骨，而且唔太喜欢鱼类，所以选择左花甲鸡煲。火锅配菜餐牌有两页，部份仲可以选择半份/一份，整体价钱合理。点左个麻辣(小辣)花甲鸡煲($198/半只)，除了麻辣酱、花甲和鸡之外，还有大量芹菜、芫茜、红洋葱、蒜头等等。整体味道好香浓，酱汁味道亦辣得有层次；鸡肉好入味，麻辣酱汁令到鸡肉非常juicy，做得几好；花甲新鲜，几清甜。单睇呢个鸡煲确实唔错。鬼马双拼包括墨鱼胶&虾胶，脆卜卜就甘沾泰式辣酱食又得，放落鸡煲煮几秒亦得，几香口几好食。豚肉卖相唔错，但味道冇咩突出既地方，特别系肉味唔够香浓，一般般吧。当食完鸡煲后加汤煮其他材料既时候，我地发觉汤底已经变到冇咩味(呢个系店方需要主动探讨下既地方)，然而我地要求店方加返d酱汁增加味道，店方亦非常乐意，服务态度都唔错。冰豆腐唔错，煮完一段时间都冇散开，仲非常嫩滑，质感一流，仲几香豆腐味添，可以一试。