風味館海鮮私房菜 (已結業)

适逢鸡煲而家做紧特价，仲要系38蚊就有一煲𠮶只，实在平得太过疯癫喇，唔嗌真系对唔住自己，落完单几分钟就有得食，鸡煲香气扑鼻，未拎到埋黎张枱就已经闻到啦， 鸡煲我地拣咗少辣，个辣度啱啱好，全枱嘅朋友都可以食得津津有味，鸡肉并无因为喺个煲入面而变得过火，仲保持著应有嘅嫩滑，食鸡煲我钟意连埋啲无乜人钟意食嘅下栏一齐食，洋葱青椒红椒乜乜乜，其实佢哋索哂啲鸡煲汁，绝对唔会比鸡肉逊色，另外有二两菜蔬无咁肉肉肉丫嘛。避风塘茄子，睇番餐牌避风塘系列入面，避风塘濑尿虾，豆腐，肉排，海虾同鸡呢啲司空见惯，避风塘茄子又真系唔系度度有㖞，新屎坑嘅我梗系会即刻嗌黎试下啦，茄子外层被炸得酥脆，难得嘅系入面仲保持著肉嫩多汁，加埋面头𠮶炸我最爱嘅蒜蓉同埋葱花，呢啲咪叫享受啰。金瑶扒时蔬，用得瑶柱黎扒梗系拣豆苗啦，一上台已经知道似样喇，碧绿嘅豆苗被瑶柱同埋金菇等等紧紧咁样拥抱住，谁也舍不得谁，一住过咁摆入口一齐食就系最高境界啦，瑶柱嘅比例劲多，多到全天候咁包围住佢地。