蒲羅

营业中

休息中

好想食海南鸡饭，决定去试呢间餐厅。佢哋开咗之后，有段日子每日午市都好多人等。开咗半年有多终于食到。堂食要加一，外卖做九折，当然又系拣买走啦。点咗海南鸡饭同热香茅鲜橙茶。收银叫15分钟返去攞。打开个袋，都用好靓嘅包装住。先饮个例汤。例汤有两大件冬瓜，饮到鸡味同冬瓜味，饮得出有落料煲。可惜太咸，饮咗三分一就放弃。到油饭。食海南鸡饭最常遇到嘅问题系生米，好在佢哋无发生。但饭唔够热，只系微暖近乎室温。鸡就的确好食。我好怕食啲太肥嘅鸡，鸡皮成层厚厚嘅脂肪包住，搣都搣唔切。佢哋嘅鸡肥瘦适中，生熟度控制得啱啱好，啖啖鸡肉都好滑，亦食到鸡味。最后系个热嘅香茅鲜橙茶，纯为好奇而点。饮唔到香茅味（或者系畀红茶嘅味道冚哂），感觉同饮热柠茶无咩分别，只不过块柠檬用咗橙取代。偏偏我讨厌饮柠茶，所以又系只饮咗几啖。总结嚟讲海南鸡系好得，但其他嘢就有改善空间。