服務周到，由進入餐廰、安排座位、落單上菜、結賬到離開都非常殷勤，連去洗手間都會帶您到門口，非讚不可！場內有外藉叔叔用木結他獻唱英文歌，聲線悅耳，唱得蠻動聽。食物品質極高，色香味美賣相一流，加埋堂煮表演，氣氛相當溫暖。
已有段長時間無到訪我最喜愛的法國餐廳 Hugo’s 喇，非常期待！雖然前來途中有少許波折，幸好到場後都不減興奮心情。內外感覺跟以往有點不同，不過依間有四十幾年歷史法國餐廳仍令我非常高興滿意，環境超級舒服。
註場結他歌手叔叔依舊，真係唱得好好聽架喎。重回舊地，氣氛有點不同，不知為何呢。飯腳轉變？燈光比以前光亮？侍應們轉變？食客較嘈吵？我個人轉變？發現有我最愛法國蠔皇 belon 供應，有食神梗係要食啦！索價每隻 $120 蚊，原來係頂級零零零。
餐湯周打蜆湯不喜歡，當然要轉堂煮招牌干邑龍蝦湯，那就絕對完美無瑕喇！點菜時間，要細心考慮，因為款款都想食呢！牛扒套餐 6 道菜，係 121212 特別日子要食得好！決定牛扒套餐及龍蝦套餐，那就可以嚐到 12 款法國佳餚美食，再另加半打 Belon 法國蠔皇做頭盤，絕頂開心透頂！
麵包籃，香草、提子乾、法包，款款都是新鮮即日焗，無限 refill 食到夠為止。雖然室溫無翻熱，不過香濃麵包味塗上幼滑牛油已非常可口，食得滋味。
法國貝隆生蠔 French Belon Oysters，我既至愛！因為係季節性，所以可遇不可求，全年只得幾個月有機會食得到。第一次遇上巨形 belon，侍應強調 3 環體形特別大隻，忍不住立即品嚐。
海水味濃略帶金屬味道，肥美結實嫩滑而爽口，極度新鮮，加少少鮮檸汁令味道更鮮。蠔甜味環繞舌齒間，餘韻持久好鬼正！以前係 Ozone 嘆過細隻 belon，口感較 creamy 而帶爽，味道更甜，金屬味更重添。
煙三文魚配多士 scottish smoked salom，入口便知道自家燻製，別樹一格。外觀賣相非常靚仔討好，砌成玫瑰花形狀配以橄欖碎，品承法國菜精緻傳統。雖然看似普通煙三文魚菜色，細味時散發清新咸香，不濁而鮮，質地黏滑帶彈，不死實不沉悶，高檔次的演繹。搭上多士薄脆，甜撞咸更添風味。
大蝦蟹肉沙律 prawn and green crab salad，聞得到的鮮蝦氣味，閃閃發光誘惑吸引好多喎，沾埋千島醬甜酸兼備，灼得剛好，蝦汁加爽彈，可口追住食。
煎鵝肝配櫻桃及爽脆沙律 Pan-fried Foie Gras with poached cherries & mesclun salad，鵝肝比以往細件好多，幸運地依然非常肥美油潤，肝味濃而沒半點羶味，煎得香脆嫩滑，入口溶化，開心滿意。以櫻桃及沙律作結，清清味蕾，舒服地迎接下一道菜。
生蠔 Seasonal Oysters，法國 Fan de clare 生蠔 3 食。原味海水咸味略重，爽爽滑滑，慢慢嘴嚼鬆軟感覺浮現，蠔鮮味突出。煙肉洋蔥焗，炒香鋪面再焗，咸香脆口。芝士菠菜焗，濕潤帶爽甜。各有特色，同樣美味。
香煎法國海鱸魚柳配香檳黑松露汁 Pan-fried Fillet of French Seabass，終於完成頭盤，進入飯局中段。魚皮煎焦香微脆，魚味較淡，肉質鮮嫩多汁。黑松露香味蛋黃醬，味道非常配合，色香味提升不少。
香煎魴魚配蜜柑茴香 Pan-fried fillet of john dory with citrus and fennel dressing，魚味比鱸魚更濃，兩面煎得金黃焦脆，魚汁鎖在內散發茴香清新味，無投訴好味道。
干邑龍蝦湯 Cognac Lobster Bisque，好耐無見使我十分懷念。先落干邑將龍蝦肉爆香，再加特濃自家龍蝦湯膽，香味環繞四周，到處游走飄揚！肥姐師傅煮理，似乎以前四眼姐師傅手藝更好。濃郁龍蝦湯汁加少許忌廉添點幼滑，洒點香草使味道更加豐富。湯汁質感滑嘟嘟，龍蝦肉彈牙鮮爽，消滅殆盡一滴不漏，心滿意足。
波士頓龍蝦配露筍 Boston Lobster Thermidor asparagus and mixed leaf salad，龍蝦新鮮到過份，啖啖肉結實彈牙散發海水味道，充滿生命力！沾點忌廉汁點綴提味更可口，有點似卡邦尼汁，但更香濃更幼滑。大大碌露筍半點渣也沒有，爽嫩脆身鮮甜多汁。
牛柳 Steak au Poivre，面頭鋪上薄薄一層黑椒碎格外香口惹味提神，剛好 5 成熟牛柳肉質軟綿棉，牛肉味香濃，牛汁飛射，舔舔嘴。焗新薯烚甘筍，竟然 side dish 份量也不少，用蠟燭興住熱辣辣。腍腍甘筍甜甜的，新薯爽粉好好食。
焗朱古力梳乎里 baked chocolate souffle，不愛甜的我在豐富晚餐後都不妨來個完美句號。熱烘烘剛出爐的梳乎里，黑朱古力甜度剛好合我口味。淋上黑朱古力漿，香濃朱古力味帶著鬆軟蛋糕，全部食晒，真係好好食。另外仲有白朱古力漿，但對我黎講就太甜喇。
醉酒櫻桃 cherries jubilee，美女甜品師堂煮醉酒櫻桃，立即加分不少！先落櫻桃再落酒，熊熊火光燃燒，觀想度極高！一粒熱辣辣軟腍多汁酸酸甜甜帶酒香櫻桃跟一啖冰凍半溶牛奶雪糕一齊放入口，冰火感覺超正！味道配合得天衣無縫，非常美味！
Hyatt black coffee，嘆埋杯香濃黑咖啡，完成任務。最後送上 hyatt 自家既雪糕脆朱古力，禮成。
2
1
