錫記雲吞麵食

营业中

休息中

以前去开深水埗，都会去食下啲怀旧嘢，理论上都系平靓正。去开大南街𠮶间就唔去啦，今日到基隆街尾太子附近个间，试吓碗云吞面。基本装修同其他云吞面舖大致相同，记得细个时啲云吞面舖，舖肉多数用黄色灯，小阶砖绿白色花地板，开住把牛角扇，因为夏天无冷气，食到标晒汗，唯一解热嘅方法，就系整支细装可乐。上次去大角嘴仲有一间咁上下，不过事隔多年，相信而家都未必喺度。因为间铺叫云吞面食，所以简简单单叫咗碗云吞面，加个鱼皮同豆浆。先讲云吞面，面底冇碱水味但系都冇蛋面味亦唔弹牙，同黄金商场附近间刘深记差好远，汤底无香味。云吞有四只几大粒，不过食开都系5粒细少少，唔紧要啦，最紧要系咪好食。好可惜，云吞里边用嘅系雪虾，而且无落大地鱼，变咗系一般食开嘅云吞面舖，无乜特别。豆浆就明显沟出嚟，饮到尾个口有少少糖精嘅酸味。反而炸鱼皮就感觉新鲜好食，不过就咸咗少少，放汤系可以接受。可能物价上升，如果以呢个价钱食就未必抵。考虑到太子区食平嘢都唔系咁易，所以用嚟填肚都系可以嘅。