正斗粥麵專家 (新城市廣場一期)

营业中

休息中

经过近日云吞面的风波，全城FACEBOOK云吞面狂洗版，冇理由唔嚟衬下热闹，呢间新开嘅沙田正斗都系第一次食，地点就当然靓啦，系最当旺嘅餐厅地下楼层，装修都算好时尚，好钟意D灯饰，好似一个个蒲公英。今日嚟到云吞面系必点项目，叫一碗细蓉慢慢品尝，面条够弹牙，唔重碱水味，云吞大小适中，每粒都好足料，汤头大地鱼味够浓，虾子味亦够，韭黄够香脆，可以称得上系一碗上等嘅云吞面。炸两，肠粉皮拉得够薄，油条食落仲系脆嘅，食完一旧又一旧，真系停唔到口。三拼粥，点咗皮蛋，牛肉，肉丸粥，粥够绵够杰，味道够晒鲜味，牛肉做到刚刚熟，够嫩，肉丸调味一流，皮蛋系流心货色，够晒香浓。唔知系唔系最近云吞面的风波带动，今晚所见呢间正斗并冇比最近嘅淡市影响，成晚都不断有客人入座，平日嚟讲生意算好好，所以边个话一定要食鲍，参，翅，肚先系算美食，食物不在乎价值，只有好食与唔好食。