康瑞甜品

营业中

休息中

同屋企人喺深水埗食完晚饭，意犹未尽，发现原来我哋就喺康瑞附近，当然唔可以错过。作为自家制芋圆专门店，甜品大部份以芋圆做主打，配合各种冷热糖水，配搭虽然唔多，但基本嘅红绿豆沙、西米露、姜汁、仙草同酒酿桂花都有齐，钟意食中式糖水嘅话的确系一个好选择。我拣咗椰汁红豆沙配，加入芋圆、地瓜圆同小丸子，红豆沙唔出色，起沙效果唔太明显，似食紧谷物粥，另外芋圆同地瓜圆唔烟韧，煮得太稔冇乜口感😢有啲失望，真系非常一般⋯⋯特式仙草百配除咗有仙草、芋圆同地瓜圆，仲有珍珠、薏米、红豆、西米同小丸子，配搭相当丰富，味道微甜，感觉好清润，虽然芋圆同地瓜圆口感都系太稔，但有烟韧嘅珍珠同清爽嘅仙草搭救👌🏼糖水另外配有植脂奶，可以自己加入糖水同调较份量，不过个人认为唔加比较好味。作为一间标榜卖芋圆嘅糖水店，佢嘅芋圆同地瓜圆的确令人失望，但糖水底不过不失，下次或者试吓冻嘅糖水会好少少。