Les Saveurs Private Kitchen (已搬遷) 新店位置

莅呢度食首先要留意价钱系每位 $788，主菜拣牛加$88，另加$88芝士拼盘，同埋留位要落订作实。位处一个比较罨耷嘅商业大厦，上到去好似去咗大酒楼后门咁，跟住侍应就带咗我哋入去一间(隔音)板间房，房入面都有几张枱，相距唔算好远，私隐度/空间感不足，不过入面果个烟花海景真系唔错，听到侍应同隔离枱讲，除夕放烟花果啲日子，晨早book到full哂。虽然已经预先从短讯收到是日菜单，侍应仍然会好有心机咁介绍，加上因为是日材料新鲜情况作出嘅微调，然后问我哋拣咩。呢度嘅食物都比较精致，睇住靓景靓食物就更系食得开心啲。食物方面点呢？佢用好多材料去造成一道菜，配搭基本上好和谐，无一样嘢入口时感觉到有任何材料或调味抢咗镜/口寡寡，除咗个汤嘅味定质地好似有啲过重。想特别一提，我颇喜欢那道慢煮三文鱼，上枱够花"肾"，肉质又刚刚好。不过总结一句，比成八百文，对于食物、环境、服务嘅期望都系高嘅，咁计佢算及格啰。