舍 (已結業)

今日同朋友經過中環，煩惱緊夜晚食咩嘅時候，竟然俾我哋喺連卡佛入邊，發現一間餐廳，呢間餐廳好特別，外表似西餐廳，但睇一睇個餐牌，原來係食中餐，見未試過，所以特登去試吓。一坐低，望到出邊勁靚嘅維港景色，佢仲有個戶外嘅Aera，可以比人出邊飲下酒，食下煙，我哋就揀咗坐室內。事不宜遲，我哋先叫一個香檳金蝦餃，呢個不得了，每咬一啖，超多蝦肉爆出黎，平時食蝦餃，感覺上皮會好厚，但呢間真係拿捏得啱啱好。再嚟我們叫左流心紫番薯。呢個番薯，外型完全同蘿蔔絲酥一樣，而且口感都一樣，不同之處就係，裏面番薯同芝士一模一樣，完全流出嚟。話明食中餐又點可以冇咗椒鹽呢樣嘢呢，我哋叫咗一個椒鹽豆腐，椒鹽豆腐完全冇油益味，外表仲要勁脆，簡直係不可不食。到湯，我哋叫咗佢個招牌花膠養生鍋，勁足料，除咗花膠之外，仲有好多湯料煲埋一齊，獨立火爐分開上，咁你慢慢飲嘅時候就唔會怕凍啦。最後，試埋佢嘅馬拉糕，叫做太極馬拉糕。其實係原味同埋芝麻味，馬拉糕都係即叫即蒸，就算之前食咗好多嘢，個馬拉糕都會好食到完全食晒。