鼎·會館 (已結業)

今日約左mentor午餐，佢話想搵個坐得舒服、可以靜靜地傾偈嘅地方，所以book左鼎·會館。一踏出升降機，已經覺得餐廳裝潢好清新，又具中國特色。陽光透過落地玻璃映照入黎，令餐廳格外醒神。食物方面亦整體令我地滿意，而且每道菜份量都唔少，必定飽肚。一開始先飲湯，花膠同雞都相當足料，好有住家湯嘅感覺。之後嘅鮑魚鵝掌調味都恰當，唔會過濃，重點係個汁唔會做得過稠。再黎兩道炒蝦同欖角骨都好出色。蝦件好新鮮同爽口，連西芹食完全去除腥味。欖角骨非常惹味，且肥瘦相間，我地食到津津有味。再黎就係稻庭烏冬同甜品。烏冬嘅湯底係濃郁嘅腐皮熬嘅，特別之餘亦味道唔錯。甜品係番薯糖水，而啲番薯一概係糖心嘅，咬落香軟，係呢餐好好嘅完結。整體來說，鼎·會館環境清幽，坐得舒服，係中環區新嘅中價午餐之選！