鮨亭 (已結業)

红桥𠮶边啲外卖食到嫌，见呢排天气凉少少开始，夜晚出嚟揾下食！置乐呢边地点虽然唔算太方便，屯市行过去要成十几分钟，就算住屯门都未必会识去，不过旁边就有马路可以泊车，揸车嘅人就好啱去！而且一带都有唔少餐厅，唔少都有得坐喺出面，静静哋都 chill下！呢间日式餐厅之前一路都想试，不过几次行过都因为无 book 位摸门钉，今次醒啦，一早 book 定就无死！角切刺身有虾、三文鱼同鱼，都几多鱼生下，沙律菜加埋柚子醋调味唔会太咸，又可以提鲜，食落好清新！只蚝有手掌咁大，睇落好新鲜，饱满肥美，一啖滑落口，淡淡海水味，真系好满足！天气凉凉哋，听到铁板嘅咋咋声已经好兴奋！和牛粒煎得非常香口，熟度适中，而口感亦好特别，唔似平时烧牛柳嘅软腍，反而有少少爽嘅质地，最啱送酒！同样系热辣辣嘅仲有石锅饭，饭面铺满厚厚嘅芝士同蟹皇，拉丝嘅芝士同鲜味嘅蟹肉捞饭一流，饭仲有少少饭焦，脆卜卜咁，好似食紧煲仔饭。啤酒上面有一层泡，入口有微微嘅巨峰香味，味道属于比较甜，而微苦嘅一种，男女都啱饮。我个人比较钟意饮梅酒，同样系比较甜嘅酒类，入口清爽，浓度唔会太高，好啱女仔少斟！