西餐大排檔 (已結業)

听到餐厅名就以为佢同普通大排挡一样？咁就错啦，呢度嘅环境系偏向Cafe类型既西餐厅，座位比较阔落，坐得舒服！精选午餐都好丰富，包括沙律、主菜、餐饮、餐汤，同一个甜品。午餐嘅沙律系日式青瓜蟹子沙律，叫日式系因为沙律用咗腐皮泥包住啲，甜甜嘅腐皮同清新嘅青瓜好夹，食落唔会过甜。食精选午餐仲可以以优惠价，加48蚊，食埋个海鲜拼盘，生蚝、鲍鱼、鲜虾、日式刺身带子、圣子刺身，特制嘅香草酱，带出生蚝嘅鲜味，清新口味；而刺身就有蜜糖芥末酱，食落鲜甜；鲍鱼大大粒；鲜虾就爽口弹牙。整个拼盘都好抵食！主菜就系香焗智利深海鳕鱼配鲜蚬汁，鳕鱼配合香煎嘅小蕃茄同荷兰豆上碟，红、绿、白色三色嘅配合大大提升视觉效果，睇见都想食。鳕鱼新鲜鲜甜，肉质鲜嫩，煮得岩岩好，鱼皮位置微煎，好香口。薯蓉内含薯仔粒，提升口感。橡皮级黑毛猪肉眼盖，同鱼一样，用咗又红又绿嘅配搭，黑毛猪肉眼盖肉质比较结实，配合埋特制酱汁，带出咗新鲜嘅肉味。甜品系芒果杨枝甘露，有浓郁嘅芒果味，西米粒粒增加咗口感，为整个午餐作一个完美嘅结尾。