牛角次男坊 (已結業)

好耐冇同啲仔女一齐出街食晚饭，因为今晚老公同朋友有约，我就约埋啲仔女一齐去淘大商场揾嘢食。行咗一圈，决定食呢间餐厅嘅定食。同好多餐厅一样，呢度都系扫QR code落单嘅，因为系三个人，所以我哋叫咗一个二人餐，外加一个自选烧肉盒子饭定食。先上嘅系盒子饭定食，呢个系阿女拣嘅，自选烧肉佢要咗牛舌同牛腹腩双拼，除咗啲烧肉，个定食仲有碗味噌汤，溏心蛋同埋一罐柠檬茶。至于味道，阿女话个牛舌有啲干身，但系牛腹腩就几好味。至于个二人餐，我哋就拣咗烧草饲牛腹腩同埋新潟松板鸡丼作为主食。前菜我哋要咗一个温泉蛋同埋一个溏心蛋，炸物喺炸酿海老，跟住仲要咗两碗味噌汤，最后个套餐仲俾埋两个细啫喱做甜品。如果问我，我会觉得个牛腹腩比啲鸡肉好食好多，起码啲牛肉系湿润的，捞埋啲酱汁同饭一齐食系都几好味。至于啲鸡，因为系切成鸡条，食落又干又硬，一啲味道都冇，完全不知所谓，所以我一定唔会推介呢个饭。我要嘅溏心蛋都叫做OK，起码真系留流心的，至于个温泉蛋，啊仔就话冇乜特别。最后要讲嘅系炸酿海老，又系超干身，如果唔沾蛋黄酱就真系食唔落口。埋单344，冇加一。呢间餐厅嘅食物真系麻麻地，个人嚟讲应该都冇下次。