沙拉姆咖喱屋

营业中

休息中

我哋一坐低就每人叫杯芒果印度乳酪，都系要少甜少冰嘅，味道几好。小食我哋就拣咗羊肉咖喱角，一份有四只，我建议大家如果叫呢个真系一定要点佢提供的酱，佢个羊肉咖喱角本身味道唔错，但系原来点咗酱之后再好食好多。我个friend拣咗个炉烤嫩鸡卷，其实我心入边有少少担心，因为呢啲印度式嘅烧烤so far我食过咁多间都系麻麻地，不过呢一间竟然有惊喜，佢真系做到个鸡肉表面有炭烤嘅㶶㶶地烧烤feel，但系入面嘅鸡肉又真系做到嫩滑多汁，仲要用铁板上热辣辣，个厨师真系要好有心机煮先做到呢个效果。另外我哋仲叫咗个菠菜蓉烩印度芝士同埋咖喱羊肉，大家唔好睇过菠菜蓉烩印度芝士成兜绿色好肉酸，其实用嚟点naan bread都不知几滋味，同埋啲印度芝士烟烟韧韧几好食。咖喱羊肉唔会太辣，好重香料未，感觉就系好正宗嘅印度咖喱。虽然我哋得两个人，但系我哋都叫咗两份naan bread再加一份印度黄姜饭先至𩠌得晒啲咖喱羊肉同埋菠菜蓉烩芝士，过咗一个好满足嘅印度之夜。