氣日本料理 (已結業)

原本想同女友揾个睇到日落既地方食野，不过大部份都系新界地区，对于我依个「香港仔」来讲实在太远，所以拣左依间有海景睇既餐厅。之前未来过，所以都唔系好知个环境系点。原来系同发型屋初初去到睇到只系坐左两台人，谂住可以同女友静静地食返餐，点知撞正个日初四，个个来食团年饭，走既时候仲有好多人等紧位。我同女友先试左几条串烧、有牛舌(原来想试和牛不过冇)、鸡软骨、白菌。用料质素唔错，而且价钱唔贵(平均25蚊左右一串)，可能比出面更平。之后叫左个寿司拼盘($200蚊左右)，材料好新鲜，只碟都好靓，不过见到美食开心过头，食完先记得要影相..。我同我女友都系大食之人，少少串烧同拼盘又点会满足到我地，之后再叫左个清酒煮砚同牛肉手打稻庭乌冬。清酒煮砚真系值得推介，时间刚刚好唔会煮得熟过头，D砚新鲜又大只，真系好好味~ 个手打乌冬实在系物有所值，乌冬口感好滑，牛肉入口即溶，完全唔似一般肥牛。最后仲试埋两款甜品，心太软同法式焦糖炖蛋，原来想食芝士饼，不过卖晒...甜品都唔驶多讲，总之平靓正，无论卖相同质素都好有水准。唯一不满系想试既几款食物都冇，唯有希望下次试到。