首首.韓式小館 (已結業)

坚韩国厨师做嘅菜有咩特色，呢日食午餐发现佢用嘅豆酱，味道好住家 feel，同以往食过嘅有明显分别；其次系白饭，餐牌写明选用仁川白米饭，食落唔糊口，有弹性；论卖相，整体感觉够养眼，特别系韩国山野菜拌饭配自家秘制大酱，一出场就搞到个个争住影相。讲唔出呢个素食餐包咗边五款菜，净系知道将菰、瓜同香叶捞埋个黄色大酱一齐食，好啱送饭，貌似豆泥嘅大酱，味道中性，唔劲喊亦唔超甜。最精彩系排喺只碟最前方嘅香菜，全靠佢阵独特香气，丰富晒成个餐。如果冇咗佢，呢个餐会失去灵魂。食肉兽之选有韩式牛肉炒鲜菰，牛肉带少少脂肪，冇肥牛咁肥，油量唔多，多啲菰仲好。戒牛族不妨食传统豆酱海鲜汤，初见貌不惊人，用筷子玩捞起，蚬仔、虾、豆腐、鱿鱼等配菜慢慢蒲头，材料好丰富。豆酱味平实，汤头清香，鲜中带甜，油腻度为零，食晒连汤都饮埋绝对冇罪疚感。每款午餐都跟餐汤同三款前菜。餐枱空间有限下，店员上菜份外小心，佢哋服务非常勤快兼有礼，赞。