Milk Bar Cafe

营业中

休息中

喺instagram见到呢间cafe差啲以为系韩国嚟，饮品、食物、餐具摆盘同装修都好韩风。听讲weekend好多人要等好耐位，所以我就揾日平日嚟等开门。比开门时间早咗三分钟到，已经有一个女仔等紧位。户外有几个位，系一个简单得嚟几靓嘅打卡位。Cafe除咗基本嘅咖啡同茶之外，仲有几款特色饮品。食物方面就只有不同口味嘅croffle同是日蛋糕。我拣咗blue latte同cream butter croffle。落单时店员话咖啡要等耐少少，由于当时少客所以只等咗几分钟。渐变色嘅blue latte好靓，底层蓝色糖浆，中间系牛奶，面头系浓缩咖啡。底层蓝色糖浆系柑橘糖浆，如果唔钟意咖啡太甜就唔好搅拌太多下，咁就唔怕饮到好大阵糖浆味。咖啡唔会太苦，味道唔错。Cream butter croffle虽然用纸碟上，但个样都好靓。忌廉食落好滑，重奶味而且唔会过甜。Croffle即系用牛角包面团整嘅waffle，食落面头少少酥脆，而且有牛油香虽然饮品同食物定价都比较进取，但系质素唔错而且睇得出店主几有心思。下次都会再嚟试下其他饮品同其他口味嘅croffle。