南小館 (已結業)

一行五人有大人有细路，周末中午时分误打误撞嚟到呢间南小馆，未入去已经畀门口宣传嘅$29只乳鸽吸引咗，结果抱著一试无妨嘅心态入去。午市餐牌选择算多，有前菜、点心、小炒、特别小食等类别。叫咗卤水蛋五花腩，两只乳鸽，陈皮虾、鱼汤面，云吞鸡汤，小笼包，烧卖等。另外再叫咗两杯台式饮品（奶盖士多啤梨），因为而家做紧第二杯半价。- 乳鸽算大只，$29/只真心系半卖半送。- 小笼包一笼5只普通尚可。- 卤水蛋五花腩超好食！五花腩滑口但唔觉油腻，应该系焖煮够耐嘅成果。- 鱼汤面中上，稍嫌鱼肉唔够多，汤底唔咸。- 云吞鸡汤中上，比上不足比下有余。- 陈皮虾卖$88有大概10只，先酥炸后揾柚子蜜加陈皮丝番兜，口感唔错而且菜式特别，值得推介！- 嘢饮算中上，$2x一杯第二杯半价即$4x有两杯。- 最后反而想讲系茶位𠮶杯茶，应该系玄米茶嚟，清香而又啱大人细路饮！埋单连加一大概$700。以5人行嚟讲，唔洗等位环境企理菜式选择以致出品大都中上，可以再来帮衬嘅地方！