星滙演 (裝修中)

爆哂假又抢唔到机票，唯有继续留港消费。今日攞咗半日假，同朋友去咗位于尖沙咀中心嘅星汇演，呢度嘅环境真系攞满分，无敌大海景遇上蓝天白云好天气，大家都心情大靓。午市套餐可选择汤或沙律，我同朋友就最钟意各选一款开心share。无论你选择汤抑或沙律，都会奉上餐包，餐包上有啲大燕麦，而包就比较湿润。是日餐汤系南瓜汤，有南瓜香之余仲好creamy。沙律除咗有沙律菜同车厘茄，仲有豆腐同鹰嘴豆，配上胡麻酱感觉清新。既然谂住慢慢坐，当然要叫好西慢慢叹，拣咗美国顶级西冷配川式炒杂菜，首先佢嘅牛扒生熟度控制得好好，并且已经预先切好，整齐排列上碟，而川式炒杂菜原来都冇乜辣味，不过用上中式香料味道系唔错。意大利牛肉烩饭份量相当多，用上免治牛肉感觉有啲似窝蛋牛肉饭，配上意大利饭，感觉就更湿润，口感更丰富。午市套餐仲配埋甜品，真系好抵食。黑森林蛋糕味道唔太甜，海绵蛋糕质感亦松软。巨峰提子卷放入口已经有阵阵嘅巨峰提子香，呢种蛋糕嘅味道比较少有，甚有惊喜。餐饮份量都大大杯，配合呢个环境就啱哂。冻柠茶茶味够浓，糖水系分开上。热咖啡好香咖啡味，热鲜奶打成奶泡，令咖啡更加香滑。