蓮園粥粉麵

营业中

休息中

初三赤口，去完朋友家，想附近清清地食粥，一家人就近行左入莲园。一入去，中间一大张枱，放左好多杂物同一盘多碗类似焦糖炖奶的甜品，系冇嘢冚住嘅。叫嘢食，老板娘问几次要唔要肠粉。后来有人想食炸两，佢好晦气话：「过年油炸鬼师傅冇返，叫左你食肠粉啦，冇炸两呀！」❌艇仔粥，冇味、少料、好水。卖$55碗难食过海皇粥店好多。❌双丸捞面，系白水烚咗就咁上枱。感觉唔对路，一问，老板娘又大大声答：「你唔讲要捞咩我地都就系咁上㗎啦，你要咩讲啦。」咁你落单又冇问埋我地捞咩酱，餐牌都冇注明。❌云吞面，汤冇味，但云吞味道尚可。小朋友用筷子敲左只碗两三下（真系唔系狂敲打鼓𠮶种），老板娘又走嚟话：「你咪敲呀！之前啲小朋友好乖，而家啲小朋友好曳，我会认得你！」😨想试啖阿女的双丸捞面，一睇，抽面夹住只瓜子咁大嘅曱甴仔！🪳🤮🪳怕女吓亲，定一定神，快快夹抽面去另一碗度。（最衰系我冇影相！！）立刻挥手叫老板娘嚟。佢见到🪳，就问：「咁你而家想点呀？要整过定系点？成碗换哂佢呀？」第一次食到曱甴面，第一次见到咁冇礼貌的老板娘！带住小朋友我冇同佢嘈交，但呢次经验值得同大家分享！呢间真心唔应该帮衬啦。