常樂素食 (已結業)

自问平时做开食肉兽，梗系觉得晚餐要有肉食先满足。女友话呢间主打台式风味既素菜馆可以满足我另类既「肉望」，所以专情约左我上黎撑枱脚。入到黎骤眼睇同外面一般中菜馆差不多，灯光通明，坐位阔落，一坐低就有侍应问饮咩茶。由于已经晚上八九几点，同女友睇完餐牌好快点左三个小菜加两个白饭。一上碟，口谂呢碟「鸿运当头」($88)乜咁似台湾街边盐酥鸡，佢上面仲铺左d炸到脆卜卜既九层塔，十分惹味。原来咬开里面系素鸡，虽然食落冇鸡味，但合埋眼食真系好易误以为食紧鸡呢。虽然「真的假不了」，但之后黎个碟叫「功德满林」($78)又试以假乱真，睇落同鱼香茄子十分似。原来佢系用左大豆蛋白同辣椒做芡，令到夹起茄子个阵有个种黏黏地感觉，食落都好入味，够晒火喉。最后呢碟「三杯猴头茹煲」，整法好似「三杯鸡」，只系今次换左猴头茹做主角，由于加左三色椒同姜葱蒜，睇落都几吸引，只系味道香到略嫌抢左猴头茹本身味道，但女友同我都钟意食浓味，所以都忍唔住食清光。食完呢餐，再谂起呢度铺名叫「常乐素食」，当堂有种好知足既滋味。