博多拉麵別天神 (已結業)

上次喺中环食过超日本装修嘅别天神之后，今日就带男朋友嚟食尖沙咀分店。呢间舖都系店面细细，但佢特别在有得许愿，俾你写完贴上墙度集气。今日坐底后店员话虾虾拉面卖晒，得返猪骨汤底，所以我地两个都嗌左同一款面，同埋一个小龙虾沙律同饺子。我最喜欢嘅系佢嘅茶水系冰嘅，岩晒热死辣辣嘅天气，坐低饮返杯降下温。今次个沙律我食到四只小龙虾，同埋佢啲粒粒蟹子，食落脆卜卜咁，好味👍🏼而佢个饺子，唔好睇佢外表平平无奇，其实佢好足料，只只都「实的的」架。好啦，拉面到啦，我好钟意佢个汤，真系好浓猪骨味，啲面质都煮到岩岩好弹牙，叉烧都又软腍又份味。虽然我地嗌左同一个面，但系男朋友就跟左佢个教学整隐藏汤底。加完拉面汁同蒜蓉同埋佢个秘制芽菜，完全系另一个味道嚟，浓好多，都好好食。搞到我下次都想试下整佢个辛辣汤底。最后食完，当然要许返个愿，集个气。我相信呢啲都系呢排香港人嘅集体愿望。