咖啡弄 (已結業)

今日放假，约左要返工嘅老公嚟咖啡弄食午餐。中午十二点几就到，幸运地唔驶等位，仲可以坐四人枱，不过好快就满座喇，有啲仲要搭枱。环境布置都几优雅，可能午饭时段人多，唔系一般cafe咁悠闲。繁忙时段每枱限坐1.5小时。食物见其他openrice食评相片都知份量唔细，喺盘算紧要三文治定窝夫好嘅时候，见到隔离枱嘅窝夫样子普通，好似好实净咁，就选择左熏牛肉三文治，对于而家要补充铁质嘅我好似较为适合。老公就要左bbq猪排三文治。另外每人最低消费一杯饮品，所以就叫左鲜橙汁、抹茶欧蕾。等左一阵食物就送到，真系好大份，每样都有三件切成半份嘅三文治，同埋沙律菜、薯仔沙律。虽然食物外表好丰富，但食落普通。先讲熏牛肉三文治，每件除左有两块厚切牛肉，仲有大量蔬菜，配蛋黄酱，牛肉只有咸味，似无肉味嘅牛𦟌，最差嘅系有大量筋位，咬唔开，三件都有同样问题。猪排三文治同样地夹有大量蔬菜，配上芥末酱，而猪排唔似平时食开嘅煎猪扒或吉列猪，反而似厚切火腿扒，唔知台湾猪排意思系咪火腿咁解，味道都系得咸味，冇猪肉味。老公话佢叫嘅抹茶欧蕾几好，唔太甜、太涩。而橙汁有大量橙肉，似鲜榨嘅。由于食物份量太多，我最后要打包一件牛肉三文治。