大阪日本料理 (已易手) 新餐厅

本来想去帝京𠮶间香田，点知原来已经执咗。于是揾吓仲有冇其他好选择，揾吓揾吓发现咗呢度，原来都系做埋呢两个礼拜就执笠，仲话抢企业抢人才，越抢越霉咁款，香港呢两年搞乜？咁趁佢未执就拿拿淋订枱试试佢。我同我老友准时到达，喺门口报上名来，阿姐带我哋去一张隐蔽舒适大卡位，呢张似乎系全餐厅最正嘅一张枱，做乜咁益我？谂住正啦，一阵醒多啲贴士。点知过咗十秒钟，另一个阿姐话搞错咗，话呢张留咗俾另一个客，叫我哋起身转枱，转返出大厅二人枱。有比较就有伤害，由八尺长大枱缩到得番两尺细枱仔，心情即刻由天堂跌落地狱，唔失望就假。又会咁都错得，同姓就带错枱，咁系咪有须就嗌老豆？算，呢啲嘢嘈都无谓，都系收拾心情睇餐牌。我哋每人叫咗个三色御膳（$178）。继带错枱之后，又再错多一次。第三道菜我老友叫天妇罗荞麦面，我就叫牛肉乌冬。点知出到嚟调转咗，块牛肉摆咗喺碗荞麦面上面，天妇罗同乌冬分开上，好明显厨房捞乱咗。呢间嘢啲伙记真系好求其，系咪谂住就嚟执笠就是是但但？我哋每人加$15转即磨咖啡，埋单$425，每人200多啲，算抵食。其实见佢都多人，啲客似系附近返工嘅人，差唔多坐满。点解咁好生意都要执笠？个市真系咁差咩？谂唔明。