名寶石餐廳

营业中

休息中

经常经过门口， 都高朋满座。 今日专登入去试下 ，好彩今日有位。呢度嘅汤好特别， 无论系忌廉汤定系罗宋汤 ，都好浓好多料， 唔同出面水汪汪。 个罗宋汤里面仲有好多菜好好味。 虽然餐包只系一般嘉顿货色， 但都热辣辣嘅浓汤特别开胃。牛柳拼大虾份量唔系太大啱啱好。 本来要咗五成熟，但系呢度系七成 。好彩牛柳本身都好淋， 冇食柴皮嘅感觉。 虾肉都几实几甜，虽然肯定系雪藏虾，但系都交足功课。烚猪手𠮶份量就大咗啲，如果一个人食有啲吃力，两个人又似乎唔够。 但其实个猪手都唔错 ，唔系太咸， 啲肉都几弹牙。 不过唔明点解跟个泰式酸甜汁， 不伦不类。可惜餐厅啲位太迫， 隔离位讲乜都听到，差唔多以为系识嘅咁。 楼底又矮 ，形成个环境好嘈杂 ，想坐多阵倾下计都唔得。