MEMOIR (已結業)

今日同朋友去咗铜锣湾食饭行街，上网揾到哩间餐厅，见佢哋餐牌同布置都好有心思同格调，环境亦舒适宁静，所以就嚟试吓。去到餐厅门口，已经忍唔住打开相机，影低靓靓嘅圣诞布置。里面环境舒适，带点点浪漫同文青感觉。我哋叫咗两个主菜同两杯饮品，食物质素真心高，有诚意、有用心嘅制作。日式海胆忌廉帆立贝意大利粉 $198卖相非常吸引，大大只帆立贝同大贝壳，连只碟都靓过人，好啱打卡用。味道水准亦十分高，海胆忌廉汁香滑浓郁，味道鲜甜，意粉烟韧有嚼劲，除咗做到al dente嘅口感外，亦做到挂汁嘅效果。帆立贝好有份量，鲜味十足。烧西班牙乳猪配苹果蓉 $318乳猪皮烧得脆卜卜，非常香口。肉汁丰富，肉味香浓。肉质亦鲜嫩，唔会嚡熠熠，配上清甜的苹果蓉，味道更鲜更有层次。薯仔烧得非常香口，好想食多几旧，番茄仔亦好多汁新鲜，正！Fresh Lemonade $48新鲜清爽，散发住阵阵柠檬香气，精神为之一振。Hojicha $28冬天嚟一杯热茶特别有幸福感。焙茶甘香，味道温和，香气浓郁。