Glasshouse (形點 I)

营业中

休息中

有2位朋友去過元朗Glass House 食晚飯，都推介我食佢地既乳豬臘腸炒飯，見佢哋講到多七情上面，都令我有所動容，想去試試係咪真係咁好食。如果真係好好食嘅話，又唔係成日食貴野嘅情況下，$350 一碗又有乜所謂，對不對？苦等差唔多30分鐘名菜終於上枱，烤至金黃色的外表，配襯着臘腸炒飯加幾條青菜，賣相確係唔錯，萬二分肚餓既我急不及待就要食佢個乳豬，姨，咁鞋既，完全同我思想當中，皮脆肉嫩濃郁脂味的感覺完全唔同，勁似煲完湯嘅肉，十分鞋口。再試下個炒飯，因為炒飯十分油膩加上臘腸太甜，所以除咗第一二啖有香口惹味嘅感覺，第三四啖開始已經十分確喉，需要不斷飲水，才能舒緩喉嚨的不適感。因為用了$350去點有誰會捨得棄飯走人呢？對不對？幾經努力下差唔多食完整碗飯，感覺幾受罪的，第一個感覺，名過於實，呢個飯有生之年應該唔會再食第二次。大家唔好中計。又貴又唔好食！寫呢篇食評，除咗告戒大家唔好中計之外，都想同大家講唔好盡信做sales嘅朋友所講嘅說話。😂唔好太易相信「水怪」😂😂😂 期待可以同大家繼續分享食評。謝謝大家寶貴嘅時間。