影片
更多
2012-07-31
38 浏览
5月31日, 之前買咗嘅團購卷今日到期, 好彩喺最後一日都book到位, 去到都有好多人等緊位, 不過裏面都幾大, 即刻安排到位俾我地~ 帶位嗰位呀叔有d似茶餐廳伙計, 唔係著制服, 服務態度唔算好, 講野大大聲~ 因為我地遞張團購卷俾佢, 佢唔係咁好禮貌咁話今日個個嚟都係用團購卷, 埋單先俾啦… 所以成晚都係佢服務, 隔離枱落單我地都聽到, 大聲到有d頂唔順…::: Buffalo Wings With BBQ Sauce (S) ::: $34S size分別有2隻雞翼同2隻雞槌~ 有辣同唔辣嘅醬汁揀, 我地要咗唔辣嘅BBQ醬, 上枱見到d醬都塗唔勻喺雞翼上面, 有d求其… 但係雞翼本身味道唔錯, 皮厚肉實, 肉質幾鮮嫩, BBQ醬夠濃味, 加上個雞皮有炸過, 好脆好香口, 估唔到賣相唔算吸引但係味道有驚喜~::: Nachos With Jalapenos & Monterey Jack Cheddar (S) ::: $39話就話要S, 但係下下用隻細碟上都唔係辦法… 就好似呢碟nachos咁, d醬已經漏到出晒邊, d nachos又想跌想跌咁, 個賣相真係同雞翼一樣咁求其…
::: Buffalo Wings With BBQ Sauce (S) ::: $34
S size分別有2隻雞翼同2隻雞槌~ 有辣同唔辣嘅醬汁揀, 我地要咗唔辣嘅BBQ醬, 上枱見到d醬都塗唔勻喺雞翼上面, 有d求其… 但係雞翼本身味道唔錯, 皮厚肉實, 肉質幾鮮嫩, BBQ醬夠濃味, 加上個雞皮有炸過, 好脆好香口, 估唔到賣相唔算吸引但係味道有驚喜~
::: Nachos With Jalapenos & Monterey Jack Cheddar (S) ::: $39
話就話要S, 但係下下用隻細碟上都唔係辦法… 就好似呢碟nachos咁, d醬已經漏到出晒邊, d nachos又想跌想跌咁, 個賣相真係同雞翼一樣咁求其… nachos上面有溶咗嘅芝士, 又有青椒紅椒, d椒就ok好食, 但為焗過有焦香同蔬菜香, 芝士看似多, 不過味唔夠濃, 令到個nachos香脆而淡味… 所以一定要靠佢附上嘅3隻醬, 有乳酪醬、蕃茄salsa醬同牛油果醬, 尤以蕃茄salsa醬最夾個nacho, 因為佢酸酸地嘅味道好醒胃, 亦夠清新~
::: Spaghetti Carbonara (S) ::: $44
Carbonara要S size都預咗係每人分得幾啖仔~ 除咗意粉, 就只係見到幾塊煙肉… 味道確實幾濃, 不過只有鹹味, 唔似Carbonara嘅味道, 蛋味唔豐富, 忌廉汁亦唔濃… 煙肉好硬, 硬到脆卜卜, 仲好乾瘦, 超級唔掂… 意粉呢就都有彈性嘅, 算合格啦.
::: Risotto With Red Wine Braised Oxtail & Parmesan Cheese (S) ::: $51
呢個意大利飯味道真係夠晒好, 因為個汁好似層相識… 食食下, 個汁又幾似平時茶餐廳嗰d燴豬扒飯嘅汁, 茄味濃, 仲有d蓋住芝士味, 但係整體個汁配上意大利飯又幾好食~ 意大利飯只係偏軟咗少少, 如果唔係就可以拍得住高級餐廳. 牛尾份量少, 只有一舊仔, 肉味偏淡, 亦都散散地.
::: British Burger With Beef, Crispy Bacon, Mature Cheddar, Lettuce & Tomatoes (S) ::: $43
插支英國國旗喺個漢堡包上面就叫做英國漢堡? 係咪咁就不得而知, 不過起碼呢個burger有番d賣相, 唔係求求其其先~ 樣樣料都幾充足, 啖啖都幾足料, 口感豐富, 加上個包有烘過下, 會有脆口感~ 唯獨係嗰塊漢堡扒乾咗d, 冇乜肉汁, 只靠芝士個汁幫唔上乜忙.
::: Chargrilled USA Hanger Steak With Chips & Red Wine Gravy (S) ::: $70
呢個美國牛扒未上枱就已經將d牛扒切到一舊舊, 上枱好似淋patpat咁, 賣相駭人… 個牛扒質地有筋又好軟乃乃, 完全冇彈性. 雖然叫咗6成熟, 都見到粉嫩嘅肉色, 但係牛味欠奉… 可幸個紅酒汁味道夠濃, 先帶番出少少味. 薯條都叫正常, 粗薯條啖啖肉唔錯, 點埋個他他醬都幾夾, 如果再炸得脆d就更好~
::: Crème Brulee With Vanilla Shortbread (S) ::: $26
Crème Brulee用玻璃樽仔裝住, 賣相精緻~ 面頭一層焦糖夠薄夠脆, 下面嘅燉蛋軟綿幼滑, 甜度適中, 絕對係意料之外嘅好食! 塊shortbread就其實似塊杏仁脆餅, 普通啦~
::: Chocolate Brownie With Chocolate Fudge Sauce (S) ::: $28
Brownie個質感都幾好, 夠實得嚟亦有綿綿嘅感覺. 加埋個朱古力醬一齊食, 好似我咁鐘意朱古力嘅人, 就覺得佢十分好食~
確實, 呢間SML以份量嚟作為賣點係幾有啅頭, 因為可以啱晒我地香港人呢d鐘意貪新鮮試多d野嘅人. 我地2個人食, 總共可以叫到8個菜, 每樣淺嚐淺嚐咁都十分滿足~ 只不過, 食物味道同賣相真係有待改善, 每樣味道一係過淡, 一係過鹹, 極其量只係普通西式茶餐廳水準. 另外, 嗰位大聲呀叔亦都搞到個環境差咗. 今次係為咗團購而食, 應該都未必會再嚟.
张贴
