GRIND SIZE

营业中

休息中

身边个个都话走，真系唔舍得，今日又同个朋友饯行，约咗喺一间打卡Cafe GRIND SIZE见个面兼留个纪念。日式蟹膏·三文鱼籽·带子·明太子手卷粉，听个名都知吸引。手卷粉系人手制造，所以每条大小不一，面质比较弹牙，我几钟意佢嘅口感。带子两边煎得咁香，而入面就仍能保持鲜嫩。三文鱼籽同蟹膏喺手卷粉之上，相映成趣，同时亦为整碟手卷粉带来更多鲜味。炸青衣鱼柳薯条配自家制他他酱有大大件鱼柳再配海量嘅薯条，真系好抵食。薯条新鲜炸起，每条都外脆内软，唔需要点茄汁都咁好食。青衣鱼柳炸粉唔算太厚，而入面嘅鱼柳就非常嫩滑又够Juicy，连埋他他酱一齐食就更加惹味。午餐跟餐加$30就可以配饮品，所以我都拣咗一杯咖啡。Rose Latte嘅奶泡同咖啡系分开上，可以自己再倒入杯内。奶泡里面已经有微微嘅玫瑰香，再加埋上面嘅玫瑰花瓣，玫瑰香味就更加扑鼻。倒入咖啡后就成为一杯精致嘅Rose Latte。甜品之中名字最特别嘅就系不是饮品·冻柠茶，原来系柠檬味sorbet配以伯爵茶味嘅心太软。心太软嘅熔岩就更加充满浓浓嘅伯爵茶香，甜甜嘅蛋糕配以酸酸嘅雪葩，真系一个非常好嘅配搭。