浜滝

营业中

休息中

是日行过九龙城。之前有朋友向我推介呢间居酒屋，反正又到咗午饭时间，又谂唔到食咩。就入去试吓啦。一入到去已经有个侍应劲热情咁招呼我。睇咗一轮餐牌之后，决定叫特大青柠梳打，三文鱼刺身，浜滝秘制炸鸡，岩手活宝蚝，仲有叫咗个必食嘅伊势海老。首先就系杯特大青柠梳打，真系超级大杯，而且青柠味超出，梳打亦都够气。三文鱼刺身，食得出系新鲜，而且亦都唔会话有筋。只蚝超大只，而且非常鲜甜，基本上唔使加任何酱料，已经食得出蚝嘅鲜味。炸鸡完全唔会话食得出有炸粉。而且新鲜炸出嚟非常惹味。最后就系必食嘅一虾两食。首先佢会用半熟嘅形式将龙虾煮熟。配上海胆，味道可以话非常之夹。而且侍应都会教你点食。佢话因为只龙虾未完全熟，所以唔建议撩入面啲虾膏嚟食，而喺稍后嘅时间，当你食完龙虾嘅肉，厨师就会将只龙虾，拎去煲汤或者煲粥。而我就选择咗将只龙虾拎去煲汤。龙虾汤味道非常浓郁。而且入面有菇，娃娃菜同埋豆腐等配料。可以话非常之丰富。整体来讲呢一餐简直系超晒班，无论系食物嘅质素。定系侍应嘅服务，可以话系一百分。