安安燒 (染布房街) (已結業)

之前食过安安烧觉得又抵食又好味，一直都好想再食多次但出旺角又有啲远㖞，咁啱今日约左好朋友喺旺角见面，就同朋友去食啦。我地叫左黑松露菌酱三重芝士捞丁，黑松露同芝士都又香，食落啖啖都有芝士味，啱晒我呢个芝士控，如果钟意食芝士，真系要嗌呢个👍惹味蒜蓉生烧茄子，茄子又大件，蒜蓉非常之多，热辣辣放入口真系好好味。烧韮菜，呢个系我每次必嗌嘅食物，非常好味，唔会太辣，但好惹味。水果牛肋条，好嫩呀，切开仲系粉红色嘅，唔会烧到好熟，而系烧到啱啱好，唔错嘅。香浓芝士烧扇贝，芝士控一定要食嘅，又系每一啖都有芝士入口，烧到啱啱好，好香。仲有烧菠萝，好甜好好汁，好食到想嗌多碟。秘制酱烧鸡中翼，个皮烧到好香，我觉得呢个比较辣，不过好惹味。