霸嗎拉麵 (已結業)

霸吗拉面开咗喺将军澳，最开心一定系住喺将军澳嘅女朋友，之前喺铜锣湾食完霸吗拉面女朋友已经问几时再去食。今晚我哋就去咗新都城「回味无穷」。我哋10点到先入去，𠮶时都仲有10几人左右等位，睇嚟霸吗拉面系香港都几好人气！今次我哋坐咗系吧枱，虽然厨房太高，我哋睇唔到啲师傅整拉面嘅过程，但令我谂起喺日本传统拉面店嘅回忆。首先嚟咗炸鸡小食，睇相都见到佢炸到好香脆，食落去唔会粉，而且每一旧都有返咁上下大小，嚟亲霸吗拉面，炸鸡都系小食嘅不二之选。终于到主角出场啦！男主角系豚肉拉面。面嘅阔度同油面差唔多，倾向硬身。一如既往，叉烧都系咁厚身，汤都系咁浓郁，份量够多，唔使加面底都已经饱到上心口。糖心蛋亦都好靓好好味！女主角就系白汤鸡拉面啦！两块厚切既鸡腿肉真系好满足，鸡肉嫩滑之余，亦都好香鸡油味。同埋每一碗拉面都放咁上下嘅葱粒，令拉面冇咁油腻，正下次再食可以试吓啲辣嘅拉面，挑战下自己！