NINETYs (皇后大道東) (已結業)

好耐之前食過呢間嘅brunch，覺得唔錯；今日約咗朋友嚟dinner，都係一樣冇令我失望:）環境好舒服，張枱有盞燈，可以自調光暗，營造氣氛！朋友嗌咗銷魂飯（$216），加配檸檬丹麥包（$18）。麵包香脆，烘得啱啱好，暖暖哋，一陣清新嘅檸檬香氣盈滿口腔，真心想知係點整嘅！呢款銷魂飯係高級日式叉燒蛋飯，超級靚呀！溫泉蛋係用日本九州蘭王蛋，蛋黃係橙色㗎，味道超濃郁，拌飯一流！自家製叉燒都好嫩滑，好惹味，配埋日本米，一個字：正！我就嗌咗波士頓龍蝦番茄醬麵（$258），加配煙三文魚（$30）。意粉比較粗圓，幾有口感；番茄醬落得啱啱好，至驚好鹹，佢係淡淡哋包裹住意粉。龍蝦正常，有埋鉗肉。加配2片煙三文魚。嘢飲嗌咗It's easy easy盡興，係青檸加奶香金萱茶cocktail。好fresh嘅配搭，顏色都好淡雅，好易入口！朋友揀咗啡酒，店員畀我哋嘅係冰杯，預先雪凍咗個杯，朋友話呢個要加分！其實佢哋咖啡幾好飲，可惜已經係夜晚，所以唔飲啡，轉飲啡酒xd咖啡味好香濃，伴隨一陣甜酒味，都係第一次試！呢度係掃qr code自點。