霸嗎拉麵 (已搬遷) 新店位置

食过一次霸吗拉面之后，就觉得好回味，成日心思思想再食～ 😋 今日喺铜锣湾行完街，就去咗登龙街嘅分店再食过～ 因为早嚟到，未到最繁忙嘅食饭时间，所以唔使排队就有位啦～ 铜锣湾嘅分店比将军奥嘅分店大，座位更多，而且有洗手间，好方便～ 因为上次食完个浓厚猪骨豚肉玉子拉面真系觉得好正，所以今次决定encore，仲要叫多个特盛炙烧豚肉拉面～ 哈哈～ 特盛炙烧豚肉拉面有四片炙烧豚肉呀～ 见到都已经口水流呀～😍 每片炙烧豚肉都好厚，而且好大片，而且脂肪分布平均，好似五花腩咁，真系好正～ 而且佢系用低温慢煮嘅方法去浸煮豚肉超过十个钟，所以肉质真系好林，然后再用明火炙烧豚肉，令到豚肉食落更加香，而且入口即溶，坚正呀👍🏻 而且豚肉又厚又大块，特盛豚肉拉面一碗仲要有四块，同朋友share完都觉得份量好够，真系大满足呀！😚 猪骨汤亦好正，浓厚而唔油腻，充满猪骨鲜味，真系忍唔住会饮晒个汤啊～ 面方面，店舖系用佢哋嘅自家打制面，我哋拣咗适中嘅面质，面爽滑而富口感，而且份量都好足够～ 玉子都好正呀！超级流心～ 冇得弹啊～ 另外，味笋都好好味呀！完全唔会好似其他店咁，太咸或者有一阵苦味～ 朋友都觉得好正啊，大满足👍🏻