有得餃 (已搬遷) 新店位置

一直都想试下呢间饺子店，每一次经过都见到间舖都见到出面有一大堆人。今次又系未够7点终于见到佢唔洗等位，梗系要入去试下系咪真系咁掂啦。既然饺子系主打，饺子就一定系走唔甩啦。两个人叫左一个面，一款饺子（8粒）同埋一碟油。叫左个炆腩肉捞面，炆腩肉好入味，而炆腩肉当然系有d肥啦，好食嘅话肥少少间唔中食下都唔紧要啦！面条系粗身嘅面，唔会煮到过淋，捞埋d腩肉汁一齐食都唔错。最后我加埋点饺子嘅酱汁一齐食，酸酸地仲开胃wor！五花肉嘅份量都唔少，两个人share 食就唔唔会话太腻。饺子叫左田园香茜花木耳猪肉饺。猪肉饺皮唔算薄，亦都唔算太厚，可以接受，饺子馅亦都算好多，加埋佢个酸酸地饺子汁好开胃啊！饺子个卖相虽然系平平无奇，食落一d都唔失礼，加埋佢既饺子汁真系唔错。佢既饺子汁仲可以拣辣同唔辣，我拣左唔辣。另外叫左碟油菜，一上枱有成半个菜咁多我都有d吓亲，好少见舖头叫油菜会有咁多！落单𠮶阵姐姐仲问我地要唔要走油，好细心。餐牌上面仲有好多唔同嘅饺子，揾日要再过嚟试多几款先得。