養心殿台式養生鍋 (已搬遷) 新店位置

今晚又想打边炉不过想食得特别啲㖞，所以选择咗旺角嘅养心殿台式养生锅。餐厅地点方便，地铁站出口大概行几分钟。入到餐厅，店员好快安排座位，餐厅装潢几好㗎，有怀旧Feel。坐底后先望望Menu，我哋选择咗”宁神养心锅”，因大家唔算肚饿，所以只系叫咗少少食物，包括极上雪花肥牛、千层冻豆腐、墨鱼丸同翠丝水莲，另外加支虎啤。坐咗大概5-10分钟食物陆续送上。宁神养心锅 - 个锅一放底时已经闻到浓浓嘅当归味，内里有鲜鸡、鲜鱼及猪肉。一等佢滚咗，食物都未落已急不及待要试饮一啖，汤底真系好浓，味道夹杂住新鲜鸡与鱼味。食完后再饮，当然味道更加浓厚，饮完一碗接一碗，真系饮汤都饮到饱。极上雪花肥牛 - 肥牛份量都唔少，只要渌几秒便可。肥牛牛肉味重而且好腍，食落犹如入口即融般。千层冻豆腐 - 豆腐本身比较硬，但渌完后变软加上啲汤会浸埋入去，口感一流。墨鱼丸 - 呢个值得推介，虽然唔系大大粒但咬落非常弹牙。翠丝水莲 - 水莲菜系本人打边必叫嘅菜，一丝丝咁渌所以好快熟，餐厅选择亦好新鲜食材。