新蒸武門 (已結業)

养生菜式工厂餐厅观塘区好似开咗好多工厂餐厅，收工过嚟食完又近屋企，所以都可以过嚟食下。女仔周时都要补下，上次经过呢间餐厅，见到有炖汤，嘢食又fashion，所以拉埋男朋友嚟陪我食。我预早两日book咗7:30 ，去到八成满人，都多人食，所以同人搭枱，坐大圆枱。 叫咗是日推介炖汤，茶树菇虫草花炖猪展，三个𩠌，豉汁带子蒸豆腐，芥末牛柳粒同埋麻辣口水鸡。茶树菇虫草花炖猪展呢个炖汤感觉几补身，虽然冇中药材料，但系可能有虫草花同埋猪展煲嘅关系，所以个汤拎上嚟已经好香。味道上冇味精，个汤应该炖左一段时间，补而不燥。豉汁带子蒸豆腐男朋友钟意食豆腐，我钟意食带子，豆腐喺底，带子中间，带子上面好多豆豉，两个主要材料都淡味，所以加埋咸小小嘅豆豉同埋豉油，食落都几搞笑，唔错。芥末牛柳粒呢个又系fashion菜，牛柳粒系油炸嘅，加埋啲红椒、黄椒、翠玉瓜粒，捞芥末酱，小小辣得来有少少甜，几特别。麻辣口水鸡有成半只鸡，够辣，岩晒我食。另外个茶都好健康，系菊花杞子红枣桂圆茶，女生补品。