聯華茶餐廳

营业中

休息中

旧式嘅店面，隐藏于西环嘅某街道中。路过可能真系唔会特别留意，就好似我咁，向附近读咗两年书都未嚟过。六点几钟嚟到，里面嘅伙记哥哥非常有霸气同埋有效率，佢嘅霸气并唔系澳牛果种串同恶，而系“呢度我地头，有乜等我搞掂，你坐低等食就得㗎喇”嘅果种，非常客气同有礼。跟焗猪扒饭有例汤，同时叫咗杯奶茶。焗猪扒饭需等候大约十五分钟，非常大碟！饭香酱甜，非常惹味。猪扒先炸后焗，有少少骨，肉质极佳，唔会韧。皮极薄，炸得脆，加上焗嘅过程，变成软性嘅松脆，口感极佳。虽然有成两碗饭嘅份量，转个头已经食得一干二净。大推焗猪扒饭，而且就我观察其他熟客所叫嘅嘢，其他茶餐厅食物都应该做得唔错。绝对值得一试。