生生。泰港知味 (已結業)

食社企为乜？为咗支持佢哋展开新生？虽然都好鼓励大家了解吓唔同嘅NGO，但又唔洗吓吓搬咩大道理出嚟—社企餐厅永远系质素嘅保证！用心经营就系帮衬嘅原因。社企餐厅要啲时间上轨道，一开始质素未必真系可以同专业泰菜齐名，但就一定会不断改进。店员按菜式类型逐一呈上，保证食客入口嘅都系绝对新鲜热辣。扎肉沙律咸咗少少，但扎肉量好多。迷你小食拼盘有春卷、鱼饼、虾饼。春卷皮脆得嚟唔油，油温控制得啱啱好。馅料满满，唔点酱都够晒味~鱼饼几弹牙，但香料味可以再浓啲。虾饼好弹牙，炸皮好薄，卜卜脆~~然后就到我极力推荐嘅冬阴海鲜汤喇！！单看色泽已赢一半。冬阴如果清澈就一定系唔够椰奶，唔够橙就系唔够蕃茄......呢碗一望就知冇悭料！有青口又有大虾，几足料。落重香料，未饮就闻到阵阵香茅、青柠味，一饮就系蕃茄酸溜溜嘅滋味，然后就系海鲜嘅鲜味，下咽后留有椰香余韵。辣椒膏炒青口用上新鲜大只嘅青口，炒完仲有少少海水味，亦唔会有沙或带腥味。甜品—黑白糯米配泰国芒果亦系必试之选。黑糯米带甜，较有咬口；白糯米带微咸，较黏糯，两者1:1互补不足，平衡出冇得弹嘅芒果糯米饭~连埋甜甜酸酸嘅靓芒一齐食，一啖汇合多种滋味同质感，正！