錦麗 (世貿中心) (已結業)

我自己本身系一个好钟意食粉面嘅人，系我嘅心目中香港最好食嘅粉面就系南记！但系全世界最好食嘅粉面，就一定系越南胡志明市嘅pho le (锦丽）！到而家我都仲系好记得年几前去越南食嘅𠮶个味道！其实较早前就知道喺香港开左分店，但系后来知道原来系大财团附属嘅牌子之后个兴趣就低左啦。最近有行铜记所以就试吓啦！其实里便环境都几迫，啲枱都好细张，当你叫咗碗粉同埋两样小食之后其实已经无位，都加上佢成日都好长人龙，所以你都唔好期望坐到好耐。讲下个重点先！今次我哋嗌左综合粉，熟牛肉粉，大虾扎肉纸米卷，炸虾饼，冻越南咖啡同咸柠檬梳打。粉面嘅质素系唔错嘅，同越南比当然系输晒啦，但系我觉得个汤底唔错既，起码我食到蔬菜烤过既味道，反而骨头嘅味道就唔系好多，属于一个比较清嘅汤头。生牛肉片不过不失，熟牛肉嘅味道反而似潮州清汤腩，反而牛丸系最有惊喜，一咬落去牛味重，系推介既！饮品类就不过不失啦，反而啲小食就真系麻麻地，完全可以唔使叫，我觉得有小小伏啰！我觉得如果想食清淡野净系食碗河粉系唔错嘅，价钱又唔系好贵，不过其他嘢可以唔使叫，悭返啲钱食甜品仲好！