豪園麵家 (已結業)

我今晚去咗黃大仙探朋友， 落咗樓下食晚餐， 呢家豪園麵家係老店，1960年代就有，價錢合理，又食到香港風味，好食。一入到去，地方環境舒適乾淨，仲有電視睇， 食物種類都好多， 朋友嗌咗煲仔飯，我就嗌咗碟炒飯，唔使一陣就有得食啦。瑤柱帶子蛋白炒飯$90+$7有汽水， 炒得好夠鑊氣， 熱辣辣上碟又好香， 啲飯粒粒分明， 帶子份量又多， 加咗蔥花同菜頭粒，更加有口感，吾會太咸，岩岩好，大大碟，食到飽晒。朋友點咗北菇滑雞煲仔飯$78， 煲仔飯呢個天氣食真係好香又暖笠笠， 啲雞好滑，好有雞味，冬菇又新鮮大粒， 仲有飯焦，啲飯焦真係好正好脆。另外加多碟腐乳生菜，好好食，油油地好滑又脆，腐乳又香，好食食落好舒服。飲左杯檸茶bb，幾特別，佢係吾同平時嘅凍樽茶， 飲落好似有檸檬茶碎， 好甘甜嘅檸檬味，唔使自己篤檸檬，幾好飲，可以試下。店員服務仲好好，會好細心幫我地加豉油落煲仔飯度，仲提點我地小心熱同教我地焗多分半鐘，仲不時主動幫我地追單，好好。整體感覺都唔錯，好好食，價錢又合理，可以再嚟，值得推介。