蝦麵店 (荃新天地) (已結業)

去到荃新天地一期食lunch，之前都知道呢度嘅最頂層有好多嘢食，但就唔係好熟路所以就好少嚟呢層搵食，不過之前見到呢度有間蝦麵館都幾出名，所以就決定嚟試下喇。鋪頭都幾企理嘅，仲有幾把風扇吊住牆添，有興趣仲可以望住個花園景食麵。睇睇菜單，其實加左一之後食碗麵加個小食都要$70，抵唔抵就大家兩睇啦，值得一讚就係小食好多元化，難得嚟到，我當然要揀返個辣蝦麵，加埋小食拼盤。小食拼盤先嚟到，真係幾有誠意，有炸豆腐，雞翼同埋串燒雞，但佢真係做到每一種食材都有佢嘅醬料。椒鹽豆腐就脆卜卜幾好食，香茅雞翼都非常入味，反而串燒雞嘅肉質比較嚡身，一般般。到主角出場喇，辣蝦麵，今次我揀咗四寶丸嘅。湯底非常濃郁，睇個色水亦都知道係好辣，其實食落個辣度非常適中，辣得嚟亦都有濃濃嘅蝦味，碗麵亦都有幾片蝦肉，不過蝦肉就比較乾身嚡身，但我覺得重點係個湯底度，辣蝦湯同蝦肉感覺就有啲似平時老火湯同埋附送嗰嚿瘦肉嘅關係。 至於四寶丸就有魚蛋，貢丸，魚腐，墨魚丸，都係中規中矩，印象中墨魚丸就好彈牙嘅。飲品叫左凍奶茶，茶香奶滑，食完辣麵飲就非常好。