馬祖台灣養生湯麵館 (和安里)

营业中

休息中

两点几行过中环见到间新开嘅养生面店,Menu有11款唔同既药膳款式,价钱$6x-7x,系中环呢度系合理既价钱,就同同事去试下小店先同事拣左虫草花药膳鸡米线,而我就拣咗香辣药膳牛肉手工面,另加五只水饺,一支冷泡四季春同埋支装雀巢牛奶咖啡。野食好快就到,份量十足,即使同事叫咗少米线,份量亦非常充足,而我𠮶碗牛肉面更加系好多旧牛肉先讲牛肉手工面, 虽然啲牛肉好大嚿,但竟然做到好林好入味,呢个系惊喜加上我拣咗中辣,个汤好惹味,而同时有药膳,感觉一流。手工面做得出色, 比我之前喺湾仔食嘅一间所谓手工面好食好多(详情可以睇番我之前既post)!!同事嘅虫草花鸡药膳米线,个汤清甜,饮落觉得无味精,而且有鸡髀仔又有鸡翼,份量都系好足料。本来想食卤水鸡翼,但已经卖晒所以我哋拣咗水饺,水饺嘅皮好滑,亦都好薄,味道唔错,不过喺牛肉面嘅对比之下,牛肉面就出色好多至于餐饮既冷泡四季春,淡淡茶香,落咗一整个茶包,我咁岩见住职员系度人手入樽,系一间有诚意嘅小店。总括而言,小店系足料同有惊喜既,最后埋单$205,呢个质素会再黎食。