騷 (已結業)

呢间骚嘅装修同陈设同一般嘅酒吧有啲分别，反而更加似楼上咖啡店，对于唔系成日去酒吧嘅人嚟讲感觉会自在一啲。最入仲有个小舞台，系俾唔同嘅本地独立音乐人举行Live Music表演用嘅。呢晚试咗几样嘢，事前晌网上睇咗其他人嘅相，对柚子蝶豆花茶非常有兴趣，见其他人啲冰块入面有柚子碎，睇落又靓又吸引，但系我𠮶杯啲冰块就无。虽然系咁，蝶豆花茶用咗三角锥型玻璃量杯载住，确系玩味十足。倒咗蝶豆花茶入去之后，再加埋柠檬汁，睇住两样嘢产生天然嘅化学作用，由紫蓝色慢慢变成紫红色，既好玩又可以重拾求学时期上实验堂嘅感觉。花茶加咗薄荷叶同柠檬汁，饮落清新，柚子味就稍轻，整体嚟讲几顺喉舒服。香煎带子伴芒果沙沙，带子烧得表面焦脆，肉质弹牙，上面嘅芒果沙沙香甜解腻。Mini Burgers，汉堡扒系用猪肉手打而成，再配埋芝士、番茄、生菜等等。当中嘅酱汁酸酸甜甜，加埋一齐几惹味。size细细，大约两三啖就食完，对女仔嚟讲几方便。当晚仲有悦耳嘅Live Music表演，演唱咗唔少耳熟能详嘅歌曲，例如系卢巧音嘅喜欢恋爱同张国荣嘅有心人等等，增添咗唔少气氛。