影片
更多
2011-04-08
146 浏览
喜万年系一间广为人知既老字号，连游客对佢都好熟识，但居然土生土长既XO仔就从未听过，请我黎既契爷都感到好意外。讲真𠮶句，用得「老牌酒家」黎形容，重要咁多外国人帮衬，心想唔方好得去边啦，点知… 今次真系跌哂眼镜！环境卫生：喜万年喺轩尼诗道同骆克道都有门口入；代客泊车要去骆克道𠮶边。酒楼喺一楼，可以选择行楼梯或者搭「车立」；佢两部「车立」都好够位架，我地成围枱十二人都坐得落有余。楼上室内装修好似几新吓，带有中国味得黎又唔系话好老套，望落都算顺眼既，最紧要系打理得干干净净，冇乜宿味。当晚我地𠮶间贵宾房又有厅又有私人洗手间，好阔落好舒服。服务：好多时旧式酒楼𠮶Ｄ姐姐仔都好高傲，不过喜万年𠮶Ｄ招呼真系好好，姐姐们既态度好诚恳，经理得闲重会走入黎睇下大家食成点。贵宾房内大部份时间有两个人负责煲野，分𩠌，换碟，真系好忙碌；唯一可以挑剔既系佢地既斟酒速度唔够快，好多时都要自己黎。味道： 喜万年乳猪全体：对电灯眼闪下闪下，差Ｄ重以为自己去左饮，制作非常认真。乳猪皮又薄又脆；唔知系只猪唔肥定系厨房帮我地去哂Ｄ肥呢？完全冇肥膏，食落觉得好健康。我地食乳猪皮时，姐姐仔就带上手套慢慢剪哂其余既猪手，猪脚，同猪肉
环境卫生：
喜万年喺轩尼诗道同骆克道都有门口入；代客泊车要去骆克道𠮶边。酒楼喺一楼，可以选择行楼梯或者搭「车立」；佢两部「车立」都好够位架，我地成围枱十二人都坐得落有余。楼上室内装修好似几新吓，带有中国味得黎又唔系话好老套，望落都算顺眼既，最紧要系打理得干干净净，冇乜宿味。当晚我地𠮶间贵宾房又有厅又有私人洗手间，好阔落好舒服。
服务：
好多时旧式酒楼𠮶Ｄ姐姐仔都好高傲，不过喜万年𠮶Ｄ招呼真系好好，姐姐们既态度好诚恳，经理得闲重会走入黎睇下大家食成点。贵宾房内大部份时间有两个人负责煲野，分𩠌，换碟，真系好忙碌；唯一可以挑剔既系佢地既斟酒速度唔够快，好多时都要自己黎。
味道：
喜万年乳猪全体：对电灯眼闪下闪下，差Ｄ重以为自己去左饮，制作非常认真。乳猪皮又薄又脆；唔知系只猪唔肥定系厨房帮我地去哂Ｄ肥呢？完全冇肥膏，食落觉得好健康。我地食乳猪皮时，姐姐仔就带上手套慢慢剪哂其余既猪手，猪脚，同猪肉件比我地食，真系噔佢手软！猪肉既肉质好嫩，而且好够味，正斗到我地成碟乳猪清哂，喜万年之清碟推介！
金钱鸡拼玻璃虾球：真系大乡里，个𩠌黎到先知原来金钱鸡唔系鸡，而系一款用肥猪肉，瘦肉，猪肝，鸡肝烧制成既菜式。听Ｄ长辈讲，依味咁高卡路里既金钱鸡好多地方都唔做架啦，要去Ｄ旧式烧腊舖先可能有得食。金钱鸡味道香浓，虽然话有肥猪肉，但系一Ｄ都唔肥腻，又唔溜！Ｄ肝一过熟就会变得又硬又干，当晚既金钱鸡完全冇依个问题，质感软熟唔干，证明时间掌握得好好。依味𩠌真系好啱身为内脏粉丝既XO仔食，今次有机会食倒，真系有口福。外表晶莹剔透既玻璃虾球都好鲜甜爽口，不过因为金钱鸡实在太精彩，大大只既玻璃虾球也只能沦为大配角。必吃怀旧推介。
红烧蟹黄大生翅：连煲滚住黎上，保证热辣辣。翅既份量好足，而且好粗，非常得体。白色既蟹肉好甜；意外地幼嫩既蟹黄唔系好溜，煮功细腻得黎好犀利，赞！细腻推介。
天妇罗虎斑球：融入左日式烹调方法，好有新鲜感。卖相可能唔系特别吸引，不过食落就知好野黎既。层炸粉够薄，所以整体非常之松化香脆，入口毫不油腻，鱼肉嫩滑无比，似乎中国功夫比日本功夫更胜一畴，全场拍手叫绝。Chinese Kungfu推介！
凉瓜生筋炆头腩：头腩炆得好够干身，食落一Ｄ都唔觉油。连苦瓜生筋都好入味；苦瓜fans们话Ｄ苦瓜好甘香wor。
蚝皇鲍角扣鹅掌：鲍角腍滑鲜甜弹牙，大大只既鹅掌亦好软滑，个汁浓郁得黎绝不过咸，好味！
潮莲脆皮烧鹅：好食过中环间X记鹅姑啰，简值系唔同级数呀。好多人食烧味都钟意选择髀肉，相反地怕骨既XO仔就只吃胸肉，最容易嚡既部位。真系鹅如其名，好脆皮，唔需要点任何酱汁，只鹅都已经好好味。烧鹅虽然大只，但连胸肉既肉质都好鲜嫩松软，咬落重有肉汁，非常之难得。个人认为此乃全港最好食之烧鹅，更可称得上为烧鹅之冠！港鹅推介！
菜心姜米粥：经理介绍一款比较清淡既单尾；食完咁多肉，食返个粥好似冇咁滞。唔知系咪Ｄ姜既作用呢，唔洗人扫，好快就有风出，好舒服（大家唔好误会，我指既系由个口出黎𠮶Ｄ气）。单尾推介！
榄菜肉碎炒兰度：好有镬气既一味，翠绿既兰度好爽甜，榄菜肉碎亦都好够味，用黎𩠌粥一流。𩠌粥推介！
蛋白杏仁露：真系high爆，姐姐仔攞埋碗蛋白喺我地面前煲制。所以虽然食到好饱，见佢咁有心机慢慢搅，小弟都好捧场地食左碗。热辣辣好暖胃，唔系好甜，而且好滑。四式甜美点：个肚既空位实在有限，所以当晚只系拣选左自己最爱既杞子桂花糕黎食；味道清香爽甜，甜品之扑鼻推介。
合时鲜果盘：当晚已经饱到冇人食得落生果，所以最怕浪费既小肥就攞哂返屋企第二朝渣汁做早餐。杯果汁好似打左针咁甜，正！
后记：虽然相中餐饭已经系旧年食，不过大家唔洗惊资料过时，因为喜万年已经成为契爷既新饭堂，所以我每个月都会有机会去检测住佢既水准，一有闪失，我会立刻会报。
张贴
