四寶食堂 (已搬遷) 新店位置

其实我已经知道楼下开咗间新餐厅好耐，不过就系次次都唔记得要帮趁，讲真，佢又唔起眼，门口又冇餐牌，都唔知原来系一间茶餐厅。咁啱今日陪公主开学，呃咗公司半日假，可以同老公去叹吓早餐，终于记得去试吓佢～～入到去，装修的确同平时嘅茶餐厅唔同，如果唔系啲邻居同我讲系茶餐厅，我都睇唔出佢系茶餐厅，舖仔细细，话坐得舒服就呃你啫，不过气氛就几好，店员又客客气气，轻轻松松咁，唔会话有种食完要赶住走嘅感觉，呢样嘢，佢哋做得几好！（可能因为冇乜生意）食物款式都算多选择，一般大路嘅茶餐厅嘢啰，火腿通，沙嗲牛肉面，ABCDE~~餐佢都有，见到佢个餐牌，叫做有个「泰式肉碎米粉」几特别，就点咗呢个，老公话见到一个「异像」，好多人都有叫沙嗲牛肉面，佢话叫呢个实唔会出事⋯⋯😂过咗一阵，好快有嘢食，沙嗲牛肉面果然不负所望，佢同其他茶餐厅真系唔同，好浓好惹味，有啲花生粒，有啲黑椒粒，真系几好泰式肉碎米呢⋯⋯佢用咗个船河汤底做，普通茶餐厅嚟讲，都算好认真。总括嚟讲，呢间餐厅仔都算系咁，气氛坐得舒服，食物有心机，招呼都okay。