星廚 (已結業)

今日原本想去太子食饺子，但估唔到9点后都仲有人等紧食饺子，最后经过见到星厨的晚餐好似几吸引，又唔需要等位，就一于试下。星厨地方唔大，台同台之间有少少逼，但环境又唔算太差，格局有D似高级西餐厅。餐牌选择唔算多，意粉同饭类加埋都系得10款左右可以拣，最后叫左一个意粉同一个饭，跟餐送餐汤同饮品，送晒两样都好抵下。杂菜汤 - 味道一般，个人认为败笔系因为D配菜都系比较硬，好似西芹个D似系最后先加入个汤度，而唔系平时罗宋汤咁D菜比较融为一体。大虾黑松露酱意大利粉 - 大虾真系好大只同有好多只虾虾虾，不过似系雪藏虾冇咩鲜虾味。反而意大利粉好香黑松露酱味，炒过的意粉软硬适中，仲要有唔少沙律菜，味道相当唔错。咖喱牛肋条饭 - 咖喱偏香辣，牛肋条啖啖肉又炆得够淋，而且配菜都好食。值得一赞系食物分量都唔少，大食的朋友都够食啊!最后见到隔离台叫左锯扒的质素好似都唔错，下次有机会真系想试下。整体而言，食物质素颇优，环境都企理，性价比真系唔错，有机会可以一试。