Mango Tree Kitchen (形點) (已結業)

今个周末同屋企人去食系元朗新开嘅 Mango Tree Kitchen  泰国菜，好食之余竟然令我有惊喜。 首先系必叫嘅猪颈肉，本身已经好钟意食猪颈肉，呢道菜煎得好香口，再配上少少辣嘅酱，作为开胃前菜系一流。连唔食辣嘅屋企人都食得津津有味，实在唔错！前菜之后就系软壳蟹沙律，炸到好脆嘅软壳蟹配上车厘茄同蔬菜丝令道菜惹味得嚟唔会太过油腻。不过值得一提嘅系浸蔬菜丝嘅酱都几辣，唔食得辣嘅朋友要注意。（屋企人唔食得咁辣，所以我自己一个清晒）之后仲有食泰国菜必叫嘅金边粉，都炒得好干身，大虾都好弹牙，系一道不过不失嘅菜式。值得一提系呢杯鸳鸯同甜品。鸳鸯上面有个奶茶雪糕球，奶茶味好突出，食落口仲有少少粒粒，相信系手作雪糕而唔系就咁买番嚟嘅雪糕球。而主角鸳鸯比例适中，甜度亦适中，用嚟解软壳蟹沙律嘅辣就啱啱好。至于甜品：椰子雪糕都有比到惊喜我。椰子雪糕亦食得出系手作雪糕，因为有少少椰子粒系入面，甜度适中。雪糕下面仲配有cream同椰子肉，成道菜都好有层次，亦令我一试难忘。成间餐厅环境都好舒适，菜式包含传统泰国菜之余亦带有惊喜，下次去元朗都必定会再去食！