素味牽 (已結業)

今日终于用诚意打动咗食肉兽陪我食素，所以就嚟咗开业不久嘅素味牵。入面嘅装修环境简约，令人坐得舒服，感觉宁静。素菜套餐选择丰富，而且佢仲有定时转换餐牌，所以每一日去帮衬都唔会觉得闷。菜式亦都唔单调，素菜配合意式香草仲有米线俾你拣，听落都觉得好特别。仲有素菜版黯然销魂叉烧饭，卖相就好似食神里面𠮶份咁都似模似样。最后决定要咗一份素菜套餐，拣咗麻辣萝卜牛腩、咕噜肉，仲加咗$5配炒菜一份。佢嘅麻辣汁令我觉得好惊喜，好香嘅麻辣味但又唔算好辣，而且佢嘅萝卜好入味，牛腩就用一啲菇类制成，都几像真，咕噜肉亦都做到酸酸甜甜，配合三色椒，真系觉得自己好似食紧咕噜肉，但就冇食肥猪肉嘅感觉，健康得来又好味，只系加$5就有好大份嘅炒菜，而且呢度仲可以添加白饭，真系好抵食。餐汤系蕃茄豆腐汤，蕃茄汤底蕃茄味非常浓郁，我饮第一啖就觉得应该要配埋个通粉放落去一齐食，咁就正到不得了。另外嘅意式香草鸡麻香米线又系一个惊喜之作，因为餐牌本身冇食物嘅图样，所以我点嘅时候心态上只不过系想食个米线，到上菜嘅时候见到卖相就已经觉得好惊喜，首先就系有一大片炒滑蛋，捞米线系带有香麻味道嘅白汁，仲有炸鸡粒，真系觉得呢个fusion菜好有惊喜